تصنيفات

22 يوليو، 2021

أبجد

رئيس مجلس الأدارة / فاطمة العالم

حسنى الجهيني : أنواع الافكار الروائية

1 min read

أنواع الافكار الروائية:

١- فكرة تتدلل وتتهيأ لك عشان تكتبها، وكإنها مخلوقة علشانك.

٢- فكرة حلوة وجميلة، لكنها من كتر حلاوتها وحبك فيها، ترغمك تقلها: أنتِ تستاهلي حد أحسن مني.

٣- فكرة قبل ما تعرفها كويس تعجب بيها، ولما تعاشرها وفي نص المشوار، تظهر على حقيقتها ناكشة شعرها وفوضوية وصعبة المراس مش زي ما كانت في الأول.

٤- فكرة قبيحة لا طبع ولا شكل، لكن بتقع في صاحب نصيبها، وبتنتهي علاقتهم دايمًا بالفشل.

٤- فكرة شهوانية، دايمًا تدخلك في سكة شمال، صعب تقومها لإن أساسها كدة ووجودها مكتسباه من كده، وإن حاولت تظبطها بقدر الإمكان لازم يبقى من أصلها السابق جذور.

٥- فكرة ثورية لابسه شال وفي إيدها طوبة، بتعترض دايمًا على كل شيء، في الغالب رغم نزاهتها بينتهي بيها الحال هي وصاحبها في زنزانة واحدة.

٦- فكرة رغاية كل ما تيجي تسكتها، تبدأ لك في موضوع تاني، عايزه صبر من صاحبها وإلا هيطلقها بالتلاته.

٧- فكرة مش عارفه نفسها عايزه إيه، ولا صاحبها عارف، بتدخلك في كذا موضوع وكلهم ملهمش علاقة ببعض.

٨- فكرة بتتقمص في نص المشوار تلاقيها مش عايزه تكلمك، ويومين وتتصالحوا وبعدين تتقمص منك تاني، عايزه صبر برضه زي الفكرة الرغاية.

٩- فكرة سهلة سهل تصاحب أي حد، وسهل تملكه أمرها، ضعيفة قصاد أي قلم حتى ولو ضعيف زيها، مش أي حد بيعجب بيها، وعشان كده هي راضيه بحالها.

١٠- فكرة مخادعة، تقولك: انت كويس، انت ممتاز، تحسسك إنك محصلتش، وتوهمك إنها في ضهرك قصاد أي صعب، لكنها ساعة الجد بتسلمك للقارئ تسليم أهالي.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *